Midzomerkemissie

‘t MIDZOMERFESTIJN is óntstaon ter gelaegeheid van ‘t 33-jäörig bestaon van V.V. de WIEN.
 
De Wien woel veur de buurt ein fees organisere boète de vastelaovestièd. ’t Sprik veur zich det dit evenement, det al mièr dan tièn jaor besteit, ein vaste plek haet beej de Wien en beej de Maagdenberg maar ouk dao boète.
 
Mièr dan 10 Jaor op riej hebbe weej, tot volle tevreejeheid van alle betrokke partieë, ein festijn kinne en meuge organisere waat binne Venlo en ouk dao boète zien vaste plek en tièdstip haet gekrege.
 
’t Evenement wuurt altièd gehalde ein waek veur de groeëte zomervekansie en deurt altièd dreej daag. De data vind geej op de pagina Data evenemente. 't Programme wuurt altièd ruum van te veure op dees site bekind gemak op de pagina Midzomerfestijn.
 
Alle dreej de daag staon d’r verschillende kermisattraksies rónd Grand Kefee De Maagdenberg. Vrièdaag s’middaags wuurt aan de kinder van de schoeël ein rundje op de kermis aangebaoje. s’ Aoves is d’r dan live mezièk op de buun op ós Maagdenbergplein.
 
De zaoterdaag hebbe weej verschillende optraejes op de buun. D’r wuurt vuuël aandach gegaeve um ein programma te make veur idderein. Met name de jeug, seniore en gehandicapte hebbe ein stripke veur beej de organisasie. s’ Aoves steit d’r weer ein good orkes op de buun.
 
De zóndaag beginne weej met ein H.Mis op de buun met daonao ein prosessie nao de Don Bosco kerk. Aansloètend aan de H.Mis en prosessie is d’r ein bónt mezièkprogramma wies in de late eurkes.
 
Op de Waterleidingsingel is zóndaags s’ middaags ein kindermert dae vuuèl minse trek en met verschillende optraejes op de buun. ’t Is dus ein evenement veur idderein, veur jónk en ald.
 
Wilt geej mier euver, of van ós weite, weej vertelle ’t óg gaer.
 
Ouk kint geej beej ós terech as geej ein optraeje wilt verzörge op ós Midzomerfestijn.
 
Weej heite óg dan ouk van herte welkóm!

Kóntakpersoeën: Wiel van Aarssen (Veurzitter)
Tillefoon: 077-3511310
E-mail: wva33@home.nl

De Wien Venlo